به‌ی و نه‌ی!

په‌شتۆ چێڕێ و چۆڵه‌چراڤۆ په‌یکه‌روو ئازادیه‌وه¹

‌په‌شتۆ وه‌یوڵه‌ پڕپۆڵینه‌کۆ والێنتاینی²

په‌شتۆ میاچه‌ماو ئۆتووبانه‌ ته‌مه‌لوول گێرته‌ درۆزنه‌کا

چا په‌شته‌ نسرمێنه‌ که‌ خواچ، ئاخرش ڤله‌ دڕه‌ینێنه‌ !

چننێ چاره‌کێن چنی قیژه‌و کناچێوێ گڕگێرتێ

هه‌ذه‌ره‌نا و مڵاسم گێرته‌ن

هه‌یان هه‌یان مله‌قوتێ ڤینای دیامانیته‌نا

نیا سوێست!

نامانی چوو په‌ڕیچه‌وه‌

دووره‌نی

دوور

زانانم و مزانووچ

به‌ڵام تاقانه‌ به‌رزی دیارکه‌وته‌

به‌ی و نه‌ی!

ئه‌ره‌نه‌کاسیا و ژووژه‌ڵه‌

په‌یت کیشوو ماڵه‌، چه‌وتیه‌کا

وه‌شه‌ویسمه‌نی

تێکه‌ڵ چنی هه‌وازه‌و باذه‌ باذیوی³ چیای!

په‌یکه‌وو ئازادی : په‌یکه‌رێوا که‌ ساڵۆ 1886 ی عیسایی شاروو "نیۆیۆرک" وو ئامریکایه‌نه‌ نریانه‌ره‌، ئیژاو واته‌یا که‌ ئی په‌یکه‌ره‌ دیمه‌نش جه‌ مس یا و وه‌ڵاتوو فه‌ڕانسه‌ی به‌بۆنه‌و 100ساڵه‌و سه‌ربه‌وێ بیه‌ی ئامریکای پێشکه‌ش پا وه‌ڵاتیشه‌ که‌رذه‌ن. ئیسه‌ ئا په‌یکه‌ره‌ بیه‌ن به‌ هێماو به‌نامێ ئازادی جه‌ وه‌رنیشته‌نه‌.

والێنتاین : ڕۆ والێنتاین یام عاشقه‌کا ڕۆیوی تایبه‌تا جه‌ فه‌رهه‌نگوو وه‌رنیشتیه‌نه‌ که‌ هه‌ر جه‌ زه‌مانوو ڕۆمی باستانیه‌نه‌ بیه‌ن و تا ئیسه‌ ئامان به‌ڵام ئیسه‌ شاخ و باڵش پنه‌ دریان، جه‌ لاو ئێمه‌یچه‌وه‌ 25 مانگۆ ڕابڕانوو گرذ ساڵێوێ بێوێ و بێ هیچ ویره‌وه‌ که‌رذه‌ی عاشقه‌کێ وه‌یوڵێوه‌ مذا هه‌نترینی

"باذه‌ باذه‌" : ورذه‌ به‌زمیوی کۆنی هه‌ورامیا که‌ گۆرانیه‌واچ چا وه‌خته‌نه‌ که‌ وه‌یوه‌شا جه‌ یانه‌و تاته‌یشه‌نه‌ زنیێنه‌ره‌، واته‌نش.

ئۆمید حه‌بیبی 7/2/1391